قازاقستاننىڭ بولجالدى التىن رەسۋرسى 1,5 مىڭ تونناعا جەتەدى

بۇل تۋرالى استانادا وتكەن باسپا ءسوز ءماسليحاتىندا ق ر ينۆەستيتسيالار جانە دامۋ مينيسترلىگى گەولوگيا جانە جەر قويناۋىن پايدالانۋ كوميتەتىنىڭ ءتوراعاسى اقباتىر نادىربايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«گەولوگيالىق زەرتتەۋ جۇمىسىن جۇرگىزۋدىڭ ناتيجەسىندە بولجامدى رەسۋرستاردى انىقتاۋ جوسپارى ورىندالدى. ناقتىراق ايتقاندا، ىزدەۋ جانە ىزدەۋ- باعالاۋ جۇمىستارىنىڭ قورىتىندىسى بويىنشا جاڭا كەن وبەكتىلەرى انىقتالدى. 1,5 مىڭ توننا التىننىڭ، 28,2 ميلليون توننا مىستىڭ، 22,6 ميلليون توننا پوليمەتاللدىڭ (بۇكىل قازاقستان اۋماعى بويىنشا - اۆت. ) بولجامدى رەسۋرستارى بەلگىلى بولدى. بۇل كورسەتكىشتەر ءبىزدىڭ مينيسترلىكتىڭ ماقساتتى ينديكاتورلارىنا ەنگىزىلدى»، - دەيدى اقباتىر نادىربايەۆ.

كوميتەت ءتوراعاسى سونىمەن قاتار قاراعاندى كومىر باسسەينىندەگى مەتاندى گەولوگيالىق تۇرعىدا زەرتتەۋ جۇمىستارى جۇرگىزىلگەنىن اتاپ ءوتتى. وسىنىڭ ناتيجەسىندە 7 پەرسپەكتيۆالى ۋچاسكەدە كومىر قاتارىنداعى مەتاندى ىزدەۋ جۇمىستارىن جۇرگىزۋ ۇسىنىلىپ، مەتاننىڭ 14 ميلليارد تەكشە مەتر مولشەردەگى بولجامدى رەسۋرسى ەسەپتەلگەن.

«سوڭعى ۋاقىتتا الەمدە ليتييگە دەگەن سۇرانىس ارتىپ كەتتى. وسىعان بايلانىس قازاقستان اۋماعىندا ليتيي قورىن ىزدەۋ باعىتىنداعى جۇمىس جاندانعان بولاتىن. وتكەن جىلى شىعىس قازاقستان وبلىسىنىڭ احمەر ۋچاسكەسىندە ليتيي ىزدەۋ جۇمىستارى جۇرگىزىلدى. جۇمىس ناتيجەسى بويىنشا وندا قالايى مەن ليتييدىڭ بولجامدى رەسۋرستارى انىقتالدى»، - دەدى اقباتىر نادىربايەۆ.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى