الماتىدا ۆەلوشەرۋگە 1,5 مىڭنان استام ادام قاتىستى
ولاردىڭ اراسىندا الماتى قالاسىنىڭ اكىمى باۋىرجان بايبەك، اكىمنىڭ ورىنباسارى ارمان قىرىقبايەۆ جانە اكىمدىكتەگى باسقارما باسشىلارى بولدى. سونداي-اق، بۇگىنگى ۆەلوشەرۋگە كاسىپقوي ۆەلوشاباندوزدار، اۋەسقويلار، زەينەتكەرلەر جانە بالالار قاتىستى. ەڭ جاس قاتىسۋشىنىڭ جاس مولشەرى - التى جاستا بولدى.
«ۆەلوشەرۋ جاقسى، كوڭىلدى ءوتتى. قۇلاپ، جاراقات العاندار بولعان جوق. بۇگىنگى ۆەلوشەرۋدىڭ قاشىقتىعى - 10 شاقىرىمنان استام بولدى. ۆەلوسيپەدشىلەر «نۇرلى تاۋ» بيزنەس ورتالىعى الدىنداعى الاڭنان تاڭعى ساعات 8:30 دا جارىس جولىنا شىقتى. ودان جەلتوقسان كوشەسى بويىمەن اباي داڭعىلىنا ءتۇسىپ، باتىسقا قاراي، وتەگەن باتىر كوشەسىنە دەيىن كەلدى.
سودان كەيىن، سول كوشەمەن تومەن قاراي - «سايران» اۆتوۆوكزالىنا دەيىن جەتىپ، تولە ءبي كوشەسىمەن شىعىسقا قاراي بەتتەدى. سودان، سايران كولىنىڭ شىعىس جاعالاۋىنا جەتىپ، مارە سىزىعىنان ءوتتى»، - دەدى «قازاقپارات» تىلشىسىنە بەرگەن جاۋابىندا الماتىدا بۇقارالىق سپورتتىق شارالاردى ۇيىمداستىرۋشى ۇيىم - «وليمپ» سپورتتىق ساۋىقتىرۋ ورتالىعىنىڭ اتقارۋشى ديرەكتورى ارمان بازارحانوۆ.
سونىمەن قاتار، ول بۇل جولعى ۆەلوشەرۋ بارىسىندا تۇڭعىش رەت ۆەلوپاترۋل جۇيەسى ەنگىزىلگەندىگىن جەتكىزدى.
«شىنىن ايتۋ كەرەك، ۆەلوپاترۋل كەرەك ەكەن. ويتكەنى، ۆەلوشەرۋگە قاتىسۋشىلاردىڭ اراسى ادەتتە الشاقتانىپ كەتەدى. ونىڭ ۇستىنە كەيبىرەۋلەر وزامىن نەمەسە ارتىنا قارايمىن دەپ، قارسى جولاققا شىعىپ كەتىپ، اپاتتى جاعداي تۋعىزادى. ءتىپتى، ۆەلوسيپەدتى دۇرىس تەبە المايتىندار دا بولادى. (بۇگىن سونداي ونشاقتى ادامدى كەزدەستىردىك). سوندىقتان، ۆەلوپاترۋل توبىن ەنگىزۋدى ۇيعاردىق. توپ بەس ادامنان تۇرادى. ولار بۇرىنعى كاسىپقوي ۆەلوسيپەدشىلەر. ۆەلوپاترۋل جول بويى ادامدارعا ۆەلوسيپەدتى قالاي تەبۋدى، جىلدامدىقتى قالاي قوسۋدى ۇيرەتىپ كەلدى. سونداي-اق، شارشاپ قالعان جاس بالالاردىڭ ارتىنان يتەرىپ، دەم الىپ الۋلارىنا مۇمكىندىك جاسادى. ەندى ۆەلوپاترۋل تۇراقتى تۇردە جۇمىس اتقاراتىن بولادى»، - دەدى ا. بازارحانوۆ.
ايتا كەتەلىك، الماتىدا بيىل ۆەلوشەرۋ تۇراقتى تۇردە اپتا سايىن وتكىزىلىپ جاتىر. ايىنا ءبىر رەت، قاتىسۋشىلارعا باعالى سىيلىقتار تابىستالىپ تۇرادى.
قاتىسۋشىلارعا ەكى تالاپ قويىلادى. ءبىرىنشىسى - مىندەتى تۇردە باستا شلەم بولۋى كەرەك جانە ۆەلوسيپەدتىڭ تەجەگىشى جاقسى جۇمىس ىستەۋى قاجەت.
اۆتور: ايبوتا جاپپاربەرگەن
