بيىلعى جىلى ىشكى جالپى ءونىم ءوسىمى بولجام بويىنشا 1,5 پايىز بولادى - ۇلتتىق ەكونوميكا ءمينيسترى
سونىمەن قاتار، ىشكى جالپى ءونىم 2016 - جىلى - 2,2 پايىز، 2017 - جىلى 3,3 پايىزعا، 2018 - جىلى 3,6، 2019 -جىلى - 4,1 پايىزعا بولجانىپ وتىر.
بۇل تۋرالى بۇگىن پارلامەنت ماجىلىسىندە «2015-2017 - جىلدارعا ارنالعان رەسپۋبليكالىق بيۋدجەت تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ق ر ۇلتتىق ەكونوميكا ءمينيسترى ەربولات دوسايەۆ ءمالىم ەتتى.
ءمينيستردىڭ ايتۋىنشا، بولجامعا ساي 2015 - جىلى نومينالدى ىشكى جالپى ءونىم 41 تريلليون 307 ميلليارد 600 ميلليون تەڭگە شاماسىندا قالىپتاسادى. ال ول كورسەتكىش 2019 - جىلعا قاراي 59 تريلليون 869 ميلليارد 900 ملن تەڭگەگە دەيىن ۇلعايماق.
«حالىقتىڭ جان باسىنا شاققانداعى ءى ج و 2015 -جىلى 12,8 مىڭ دوللاردى قۇرايتىن بولادى، ال بۇل كورسەتكىش 2019 - جىلى 17,6 مىڭ دوللارعا دەيىن ۇلعايادى»، - دەدى مينيستر ەربولات دوسايەۆ.
سونىمەن قاتار، 2015-2019 - جىلدارعا ارنالعان الەۋمەتتىك- ەكونوميكالىق دامۋىنىڭ ناقتىلانعان بولجامىنا توقتالعان ۇلتتىق ەكونوميكا ءمينيسترى، مۇناي باررەلىنىڭ باعاسى 50, 40 جانە 30 دوللارعا دەيىن جانە مەتالعا باعا يندەكسى 5 پايىزعا تومەندەۋى بويىنشا قازاقستان ەكونوميكاسىنىڭ دامۋ بولجامى ازىرلەنگەنىن اتاپ ءوتتى.
«بۇل رەتتە بارلىق ءۇش سسەناري بويىنشا دا مۇناي ءوندىرۋ كولەمى 2015 - جىلى - 80,5 ميلليون توننا، 2016 - جىلى - 80,8 ميلليون توننا، 2017 - جىلى - 86 ميلليون توننا، 2018 - جىلى - 90 ميلليون توننا جانە 2019 - جىلى - 93 ميلليون توننانى قۇرايدى. جالپى، بازالىق سسەناري بويىنشا 2015-2017 - جىلدارى مۇناي باعاسىنىڭ بىر باررەلى 80 دوللاردان 50 دوللارعا دەيىن، 2018-2019 - جىلدارى باررەل باعاسى 60 دوللارعا دەيىن تومەندەيدى دەپ بولجانعان»، - دەدى مينيستر.
تۇتاستاي العاندا، رەسپۋبليكالىق بيۋدجەت شىعىستارى 2015 - جىلى 7 تريلليون 244,5 ميلليارد تەڭگەگە بولجانىپ وتىر. بۇل بۇعان دەيىن ناقتىلانعان كورسەتكىشكە قاراعاندا 610,7 ميلليارد تەڭگەگە از. يمپورت پەن ىشكى جالپى ءونىم بويىنشا بولجامنىڭ تومەندەگەنىن ەسكەرە وتىرىپ، مۇنايدىڭ باعاسى باررەلىنە 50 دوللار، ەكسپورتتىق باج تونناسىنا 60 دوللار بولعان كەزدە رەسپۋبليكالىق بيۋدجەتتىڭ كىرىستەرى 2015 - جىلى 3 تريلليون 219 ميلليارد 900 ميلليون كولەمىندە باعالانادى. بۇل ناقتىلانعان بيۋدجەتكە قاراعاندا 939 ميلليارد 600 ميلليون تەڭگەگە تومەن» ، - دەدى مينيستر.
ونىڭ ايتۋىنشا، 2015 - جىلى بيۋدجەت تاپشىلىعى 259 ميلليارد 400 ميلليون تەڭگەگە نەمەسە ىشكى جالپى ءونىمنىڭ 3 پايىزىنا دەيىن ۇلعايتۋ ۇسىنىلادى. ال، ۇلتتىق قوردان كەپىلدەندىرىلگەن ترانسفەرت مولشەرى 1 تريلليون 702 ميلليارد تەڭگە دەڭگەيىندە ساقتالادى.
«جالپى العاندا، 2015 - جىلى ونەركاسىپ 0,3 پايىزعا قىسقارسا، بۇل كورسەتكىش 2019 - جىلعا قاراي 2 پايىزعا دەيىن ۇلعايادى. ءوندىرىس كولەمى جانە ونەركاسىپ ونىمدەرى ەكسپورتىنىڭ تومەندەۋى مەن ينۆەستيتسيالاردىڭ باسەڭدەۋى سالدارىنان قىزمەتتەر سالاسىنىڭ ءوسىمى 2015 - جىلى 2,2 پايىزعا دەيىن قىسقارۋى بولجانادى. سونىمەن قاتار، ۇلتتىق بانكتىڭ بولجامى بويىنشا ەكسپورت كولەمى 2015 - جىلى 44,7 پايىزعا نەمەسە 43 ميلليارد 600 ميلليون دوللارعا دەيىن تومەندەيدى. يمپورت 21,8 پايىزعا نەمەسە 34 ميلليارد 700 ميلليون دوللارعا دەيىن ازايادى. ينفلياتسيا دەڭگەيى بۇرىن ناقتىلانعان 6-8 پايىز دالىزىندە ساقتالادى»، - دەيدى ە. دوسايەۆ.
اۆتور: قانات مامەتقازى ۇلى
