باستاۋىش مەكتەپتەگى وقۋشىنىڭ ءبىر كۇنگى وقۋلىعىنىڭ سالماعى 1,5-2 كەلىدەن اسپاۋى كەرەك - ءبىلىم جانە عىلىم ءمينيسترى

بۇل تۋرالى بۇگىن پارلامەنت ماجىلىسىندە «وقۋشىلاردى وقۋلىقتارمەن جانە وقۋ- ادىستەمەلىك كەشەندەرمەن قامتاماسىز ەتۋ پروبلەمالارى مەن شەشىمدەرى» تاقىرىبىندا وتكەن ۇكىمەت ساعاتىندا ءبىلىم جانە عىلىم ءمينيسترى اسلان ءسارىنجىپوۆ ءمالىم ەتتى.

 «1-4 - سىنىپتارعا ارنالعان وقۋلىقتىڭ سالماعى 300 گرامنان، 5-6 سىنىپ وقۋلىقتارى 400 گرامنان، ال 7-10 سىنىپتار وقۋلىعى 500 گرامنان اسپاۋى كەرەك. ال 11 سىنىپتارعا ارنالعان وقۋلىقتىڭ سالماعى التى ءجۇز گرامنان اسپاۋى شارت. بۇعان قوسىمشا، ءبىر وقۋشىنىڭ ءبىر كۇنگە ارنالعان وقۋلىقتارىنىڭ سالماعى باستاۋىش مەكتەپتە 1,5-2  كەلىدەن اسپاۋى كەرەك. ال سەگىزىنشى، توعىزىنشى سىنىپتاردا ءتورت كەلىدەن اسپاۋى ءتيىس»، دەدى اسلان ءسارىنجىپوۆ.

 ءوز كەزەگىندە سانيتارلىق- ەپيدەمولوگيالىق قاداعالاۋ كوميتەتىنىڭ ءتوراعاسى جانداربەك بەكشين بىلتىرعى جىلى 3-10 - سىنىپتاردىڭ وقۋلىقتارى وسى ماسەلەلەر بويىنشا تولىقتاي تەرىس قورىتىندىعا يە بولعانىن العا تارتادى. «فيزيكا، الگەبرا، بيولوگيا پاندەرىنىڭ وقۋلىعى سانيتارلىق تالاپتارعا ساي ەمەس، بۇلاردىڭ سالماعى ارتىپ كەتكەندىكتەن ءبىز ءبىر وقۋلىقتى ەكىگە ءبولۋدى ۇسىندىق. ءبىر كۇندىك ساباق كەستەسىنىڭ وقۋلىقتارى 1-3 - سىنىپتار ءۇشىن 2 كەلىدەن اسپاۋى كەرەك. 8-9 - سىنىپتاردىڭ ءبىر كۇندىك وقۋلىعى 4,5 كەلىدەن اسپاۋى شارت ەدى. قازىرگى ۋاقىتتا بۇلاي بولماي وتىر» ، دەدى ج. بەكشين.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى