قىرعىزستاندا 1-4-عاسىرداعى ادام سۇيەكتەرى مەن زاتتار تابىلدى
بۇل تۋرالى قازاقپارات قىرعىزستاننىڭ كابار اگەنتتىگىنە سىلتەمە جاساپ حابارلايدى.
باتكەن مەملەكەتتىك ۋنيۆەرسيتەتىنىڭ مالىمەتى بويىنشا، قازبا جۇمىستارى جۇرگەن ايماقتا زيرات، مولا، ارحيتەكتۋرا نىساندارى، ءۇي مەن پەتروگليفتەرى بار. بۇل جەردە كەيىنگى زەرتتەۋلەر 1954-1960 -جىلدارى جۇرگىزىلگەن.
ارحەولوگيالىق ەكسپەديتسيا باسشىسى، تاريح عىلىمدارىنىڭ كانديداتى ءابدىنابي قادىروۆتىڭ ايتۋىنشا، قازۋ كەزىندە تابىلعان ەسكەرتكىشتەر قارابۇلاق زيراتى داۋىرىنە جاتۋى مۇمكىن. بۇل القاپتان 150-200 ارحەولوگيالىق ەسكەرتكىش تابىلدى.
ونىڭ سوزىنشە، زەرتتەۋ بارىسىندا 1-4-عاسىرلاردا ءومىر سۇرگەن ادامداردىڭ جەكە زاتتارى تابىلعان.
«اداممەن بىرگە كومىلگەن ساۋىت، 3 پىشاق، قانجار، جەبەنىڭ ۇشى مەن بەلدىكتەر انىقتالدى. قارابۇلاق ەسكەرتكىشتەرى 1-4-عاسىرلارعا جاتادى. سول كەزدەگى سالت بويىنشا، قايتىس بولعان ادامنىڭ جانىنا جەكە زاتتارى، ايەلدەردىڭ جانىنا اشەكەي بۇيىمدار، باس جاعىنا ىدىسقا سالىنعان اس قويىلاتىن»، - دەپ حابارلادى عالىم.
ول تابىلعان زاتتار راديوكومىرتەك تالداۋىن جاساۋ ءۇشىن ەۋروپا زەرتحاناسىنا جىبەرىلەتىنىن اتاپ ءوتتى.
«زەرتتەۋدەن كەيىن قورعاننىڭ قايدان شىققانىن ناقتى بىلەمىز»، - دەدى ءابدىنابي قادىروۆ.
