ەندى 1,4 ميلليون قازاقستاندىق اتاۋلى الەۋمەتتىك كومەك الادى

بۇل تۋرالى بۇگىن ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.

«اتاۋلى الەۋمەتتىك كومەك الۋ شارتتارىنىڭ ءبىرى ەگەر وتباسىدان جۇمىسقا قابىلەتتى تۇلعا بولسا، وندا الەۋمەتتىك كەلىسىمشارت جاساۋ بولىپ سانالادى. بۇگىنگى كۇنى قازاقستان بويىنشا اتاۋلى الەۋمەتتىك كومەكتى 1,4 ميلليون ادام الادى. بۇل شامامەن 285 مىڭ وتباسى»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.

بەردىبەك ساپاربايەۆتىڭ ايتۋىنشا، ولاردىڭ ىشىندە 385 مىڭ ادام جۇمىس ىستەۋگە قابىلەتتى.

«ولار الەۋمەتتىك كەلىسىمشارت جاساسىپ، جۇمىس ىستەۋلەرى ءتيىس. جۇمىس جەرگىلىكتى جەرلەردە ۇسىنىلادى. ءبىز بوس جۇمىس ورىندارى مەن جۇمىس سۇراپ جۇرگەن تۇلعالار سانىن ساراپتاعان ەدىك. بوس جۇمىس ورىندارى كوپ بولىپ شىقتى. ەگەر قازىرگى ۋاقىتتا اتاۋلى الەۋمەتتىك كومەككە 110 مىڭ تەڭگە الىپ، ۇسىنىلعان جۇمىس جالاقىسى 80-90 مىڭ تەڭگە بولسا، وندا سول جۇمىسقا بارۋعا كەلىسۋ قاجەت»، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى