قازاقستاندا نەكەنى تىركەۋ ءراسىمى 1 ايدان 3 كۇنگە قىسقارادى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، كورسەتىلەتىن مەملەكەتتىك قىزمەتتەردى ەلەكتروندى فورماتقا اۋىستىرۋ سالاسىنداعى نورماتيۆتى-قۇقىقتىق بازانى جەتىلدىرۋ ءۇشىن 43 زاڭ مەن 10 كودەكستە 500 تۇزەتۋدى قاراستىراتىن زاڭ جوباسى ازىرلەنگەن.
«اتالعان زاڭ جوباسى ۆەدومستۆوارالىق كوميسسيانىڭ ۇسىنىستارى اياسىندا كورسەتىلەتىن 121 مەملەكەتتىك قىزمەتتى وڭتايلاندىرۋعا باعىتتالعان ءبىرقاتار تۇزەتۋلەردەن تۇرادى. بىرنەشە مىسال كەلتىرە كەتەيىن. ءبىرىنشى - نەكەنى تىركەۋ قىزمەتىن وڭتايلاندىرۋ ارقىلى بۇرىن 1 ايعا سوزىلعان پروتسەستى 3 جۇمىس كۇنىندە راسىمدەۋگە مۇمكىندىك بەرىلەدى. ەكىنشى - سالىق تولەۋشىلەردىڭ ارتىق تولەنگەن سوماسىن اۆتوماتتى تۇردە قايتارۋ قاراستىرىلادى»، - دەدى داۋرەن ابايەۆ.
ۇشىنشىدەن، ءمينيستردىڭ ايتۋىنشا، كورسەتىلەتىن مەملەكەتتىك قىزمەتتەردىڭ ءتارتىبىن ءبىر عانا نورماتيۆتى اكت - ەرەجەلەر ارقىلى رەتتەيتىن تۇزەتۋلەر دە پىسىقتالىپ جاتىر. جالپى العاندا 3,5 مىڭ ستاندارت پەن رەگلامەنت وزگەرتۋگە جولدانادى.
«سونىمەن قاتار، تۇزەتۋلەردىڭ اياسىندا «پيلوتتىق جوبا» تۇسىنىگىن ەنگىزۋ جوسپارلانىپ وتىر. وسىلايشا كەيبىر كورسەتىلەتىن قىزمەتتەردى الدىن- الا قولدانىپ كورەمىز. تاۋەكەلدى تۇستارىن انىقتاپ، حالىققا ىڭعايلى جولدارىن قاراستىرىپ، تاڭداپ الامىز. بۇل كورسەتىلەتىن مەملەكەتتىك قىزمەتتەردى وڭتايلاندىرۋ مەرزىمىن قىسقارتادى. قازىرگى ۋاقىتتا وسىنداي وزگەرتۋلەر جارتى جىلداي ۋاقىتتى الادى. سونداي-اق، وسى ارقىلى الەۋمەتتىك اسەرى بار ماسەلەلەرگە بايلانىستى تاۋەكەلدەردى تومەندەتەمىز. ويتكەنى پيلوتتى جوبانى قاجەتتى ۋاقىتتا توقتاتۋعا جانە وزگەرتۋگە، ازاماتتارعا كەرى اسەر ەتپەۋىن قاداعالاۋعا مۇمكىندىك بەرەدى»، - دەدى مينيستر.
ونىڭ ايتۋىنشا، اتالعان شارالاردىڭ ناتيجەسىندە 2019-جىلى كورسەتىلەتىن مەملەكەتتىك قىزمەتتەردىڭ 80، ال 2020-جىلى 90 پايىزى اۆتوماتتاندىرىلادى.
«ءبىر جىلدا قاعاز تۇرىندە ۇسىنىلاتىن 110 ميلليون قۇجات قىسقارادى. ەڭ باستىسى كورسەتىلەتىن قىزمەت تۇرلەرى حالىققا ۇعىنىقتى، قولجەتىمدى جانە پايدالى بولۋى ءۇشىن بار كۇش-جىگەرىمىزدى، مۇمكىندىكتەرىمىزدى جۇمساۋعا دايىنبىز. وسى باعىتتاعى جۇمىستار ءبىر ساتكە دە توقتامايدى. نەگىزگى ماقسات - ەل تۇرعىندارىنىڭ ساعاتتاپ كەزەك كۇتپەي، قاجەتتى قۇجاتىنا جىلدام ءارى وڭاي قول جەتكىزۋىنە جاعداي جاساۋ، ۇكىمەت پەن بيزنەستىڭ، ازاماتتاردىڭ اراسىنداعى ينتەگراتسيانى جاڭا دەڭگەيگە كوتەرۋ»، - دەدى ول.
