گەرمانيادا 1,3 ميلليوننان استام بۇرىنعى قازاقستاندىق ازاماتتار تۇرىپ جاتىر
بۇل تۋرالى بۇگىن استانادا تىلشىلەرگە تانىمال نەمىس مادەنيەت تانۋشىسى، تاريحشى، ەتنوگراف جانە پۋبليتسيست ياكوب فيشەر ءمالىم ەتتى.
«كەزىندە قازاقستاننان وزدەرىنىڭ تاريحي وتاندارىنا كوشىپ كەتكەن قازاقستاندىق نەمىستەر گەرمانيادا 1 ميلليون 300 مىڭنان اسادى. بۇرىنعى قازاقستاندىقتاردىڭ قاتارىندا نەمىستەر عانا ەمەس، 100دەن استام ۇلت وكىلدەرى دە بار. ولاردىڭ ىشىندە شامامەن 60 مىڭ ادام ۇلتى قازاق باۋىرلارىمىز. ولار نەگىزىنەن نەمىسكە كۇيەۋگە شىققان نەمەسە نەمىس ايەل العاندار جانە ولاردىڭ تۋعان- تۋىستارى»، - دەيدى ول استانادا «ۆوزروجدەنيە» نەمىس قاۋىمداستىعىنىڭ «ءتىل - حالىق جانىن تانۋدىڭ كىلتى» اتتى شارانىڭ اشىلۋىندا.
ايتا كەتۋ كەرەك، يا. فيشەردىڭ ءوزى قازاقستان تۋماسى، ول وڭتۇستىك قازاقستان وبلىسى سارى اعاش اۋدانىندا دۇنيەگە كەلگەن. تەمىرتاۋدا، الماتىدا نەمىس تەاترلارىندا ەڭبەك ەتتى.
«بۇگىن مەنىڭ تۋعان كۇنىم، 59 جاسقا كەلىپ وتىرمىن. مەن ءوز مەرەيتويىمدى قازاقستاندا، بۇگىندە تانىماستاي وزگەرىپ كەتكەن ءوزىمنىڭ وتانىمدا تويلاپ وتىرعانىما قۋانىشتىمىن. بۇرىن مەن تەمىرتاۋ قالاسىندا نەمىس تەاترىندا قىزمەت ىستەدىم. استاناعا ءتۇرلى گاسترولدەرمەن 100 مارتە كەلگەنمىن. بۇگىن قالادا قانشا جۇرسەم دە، بۇرىنعى اقمولادان ەشتەڭە تاني الماي وتىرمىن. استانا كەرەمەت قالاعا اينالعان. مۇندا ءاردايىم نەمىستەردى وتە جىلى قارسى الادى» ، - دەپ اتاپ ءوتتى ول.
يا. فيشەر قازىرگى ۋاقىتتا گەرمانيادا «ساپارداعى حالىق. ك س ر و/ت م د نەمىستەرىنىڭ تاريحى مەن بۇگىنى» اتتى كوشپەلى كورمەنىڭ جەتەكشىسى. ەۋروپادا جانە ت م د- دا ءجۇرىپ ول، قازاقستان تاريحى، سونداي- اق قازاقتاردىڭ جەرىندە تۇرىپ جاتقان ەتنيكالىق نەمىستەردىڭ تاعدىرى تۋرالى كوپ ماعلۇماتتار بەرۋگە تىرىسادى. سونىمەن بىرگە ورىس، نەمىس جانە قازاق تىلدەرىن جەتىك بىلەدى.
« ءبىزدىڭ اۋىلدا نەمىستەر قازاق تىلىندە، قازاقتار نەمىس تىلىندە ەركىن سويلەسە الاتىن. مەن قازاقستانداعى بارلىق ازاماتتار قازاق ءتىلىن جەتىك ءبىلۋىن قالار ەدىم. ۇلتىنا قاراماستان بارشا قازاقستاندىقتار مەملەكەتتىك ءتىلدى مەڭگەرەتىن كۇن الىس ەمەستىگىنە كامىل سەنەمىن» ، - دەدى يا. فيشەر.
اۆتور: جاسۇلان جولدىبايەۆ
