ۆاكسينانىڭ 1 جانە 2 دوزاسى ارالىعىن ۇزارتقان ءجون بە: دارىگەرلەر پىكىرى ەكىگە جارىلدى
«ءبىز ۇستانىمىزدى بىلدىردىك جانە باس مەملەكەتتىك سانيتار دارىگەردىڭ جاڭا قاۋلىسىنا قارسىمىز. قارسى بولۋىمىزدىڭ سەبەبى، ەڭ الدىمەن 45 كۇن دەگەن ءمىن ەش جەردە، ەشبىر مالىمدەمەدە جوق. گامالەي گينسبۋرگ اتىنداعى ورتالىق ديرەكتورىنىڭ حاتىندا ارالىقتىڭ 21 كۇننەن 90 كۇنگە دەيىن ۇلعايتىلۋى مۇمكىن ەكەنى كورسەتىلگەن. ياعني، ادامداردىڭ تاڭداۋى بار. ەگەر ولار ۇلگەرمەسە، ءبىر جاققا كەتىپ قالسا، وندا ۆاكسيناتسيانى كەيىنگە قالدىرا الادى. ءبىرىنشى كومپونەنت ەگىلگەننەن كەيىن ەكىنشى كومپونەنتتى 45 كۇندە ەگۋ تۋرالى شەشىم ادامداردى ۇزاق ۋاقىت بويى قورعانىسسىز قالدىرادى»، - دەدى ول Experts Hub Kazakhstan جوباسى ساراپشىلارىنىڭ دوڭگەلەك ۇستەلى بارىسىندا.
ونىڭ اتاپ وتۋىنشە، ءبىرىنشى دوزانى العاننان كەيىن 2 اپتا وتكەن سوڭ ادام اعزاسىندا يممۋنيتەتتىڭ جەتكىلىكتى قورعانىسى پايدا بولادى.
«ءبىرىنشى مەن ەكىنشى دوزانىڭ اراسىندا 45 كۇن كۇتۋگە تۋرا كەلەدى. بۇعان قوسا، جەتكىلىكتى قورعانىس الۋ ءۇشىن تاعى ەكى اپتانى قوسىڭىز. ءبىرىنشى دوزادان كەيىن اۋىرىپ قالعانداردىڭ سانىن ەسكەرەتىن بولساق، مۇنىڭ بارلىعى ادامداردىڭ ۆاكسيناتسيا باعدارلاماسىنا دەگەن سەنىمىن جوعالتادى»، - دەدى بوتاگوز كاۋكەنوۆا. سوندىقتان ول ادامدارعا ءبىرىنشى دوزانى العاننان كەيىن 21- كۇندە نەمەسە كەيىنىرەك الۋ مۇمكىندىگىن بەرۋ قاجەتتىگىن ايتادى. ال مەديتسينا عىلىمدارىنىڭ دوكتورى ءلاززات ەراليەۆا مۇنداي پىكىرمەن كەلىسپەي، ەكى دوزا ارالىعىن 90 كۇنگە سوزۋدىڭ ەش قاۋپى جوق ەكەندىگىنە نازار اۋدارتادى.
«انتيدەنە دەڭگەيى ۋاقىت وتە ارتا تۇسەدى. 21 كۇننەن كەيىن 1 دەڭگەي، ءبىر ايدان سوڭ باسقا دەڭگەي بولادى. ارالىقتى 90 كۇنگە دەيىن سوزۋدىڭ ەش قورقىنىشى جوق. ءسىز قورعانىستا بولاسىز، ويتكەنى ءبىرىنشى ۆاكسينانى الدىڭىز. سىزدە ءبىرىنشى دوزادان كەيىن قالىپتاسقان انتيدەنەنىڭ جەتكىلىكتى دەڭگەيى بولادى. سودان كەيىن 90 كۇننىڭ ىشىندە ەكىنشى دوزانى الاسىز»، - دەدى ءلاززات ەراليەۆا.
اۆتور: مارلان جيەمباي
