قازاقستاننىڭ اۋىل شارۋاشىلىعى ماقساتىنداعى جەردىڭ 1,2 پايىزى عانا جەكە مەنشىكتە - ە. دوسايەۆ

بۇگىن پارلامەنت ءماجىلىسىنىڭ جالپى وتىرىسىندا ق ر ۇلتتىق ەكونوميكا ءمينيسترى ەربولات دوسايەۆ وسىلاي ءمالىم ەتتى.

 ەسكە سالا كەتەيىك، وتىرىستا «ق ر جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا تالقىلانعان بولاتىن. قۇجات ەلباسىنىڭ «100 ناقتى قادام» ۇلت جوسپارىن جۇزەگە اسىرۋعا باعىتتالادى.

«بۇگىنگى كۇنى جەر تولىققاندى نارىقتىق قۇرال بولماي وتىر، سونىمەن قاتار، اۋىل شارۋاشىلىعى سالاسىنداعى ءوتىمدى اكتيۆ تە ەمەس. سونىمەن بىرگە، اۋىل شارۋاشىلىعى جەرلەرىنىڭ نەگىزگى ۇلەسى 97,4 ميلليون گەكتاردىڭ 98,8 پايىزى ۇزاقمەرزىمدى جالداۋدا بولسا، تەك 1,2 پايىزى عانا جەكە مەنشىكتە. وسىلايشا، مەملەكەتتىك قوسالقى اۋىل شارۋاشىلىعى جەرلەرى نارىق اينالىمىنا ەنگىزىلمەگەن تۇرىندە ءتيىمسىز جاعدايدا قالىپ وتىر»، - دەيدى مينيستر ەربولات دوسايەۆ.

 ونىڭ ايتۋىنشا، بۇگىنگى تاڭدا جەردى جالعا الۋشىلاردىڭ باسىم بولىگى ونى ادال نيەتپەن پايدالانىپ جاتقان جوق. ۇتىمدى پايدالانۋ بويىنشا تالاپتار دا ورىندالماي كەلەدى. «ماسەلەن، جەردى وڭدەۋ بويىنشا زاماناۋي تەحنولوگيالار ەنگىزىلمەيدى. بۇعان جەردى جالداۋ قۇنىنىڭ تومەندىگى دە اسەر ەتەدى. وسىعان بايلانىستى زاڭ جوباسىنىڭ نەگىزگى ماقساتى اۋىل شارۋاشىلىعى ءۇشىن پايدالانىلاتىن جەرلەردى ۇتىمدى جانە ءتيىمدى پايدالانۋدى قامتامسىز ەتۋ بولىپ تابىلادى. بۇل رەتتە جەرلەردى جەكە مەنشىككە تابىستاۋدىڭ جاڭا تەتىكتەرىن ەنگىزۋ قاراستىرىلادى»، - دەدى ۇلتتىق ەكونوميكا ءمينيسترى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى