شەتسىز قالا: الماتىدا بيىل 1,1 مىڭ شارشى مەتر تۇرعىن ءۇي پايدالانۋعا بەرىلدى
بۇل تۋرالى الماتى قالالىق جوسپارلاۋ جانە ۋربانيستيكا باسقارماسىنىڭ باسشىسى الماسحان احمەدجانوۆ ايتتى، دەپ حابارلايدى قازاقپارات ءتىلشىسى.
«بيىل مەملەكەتتىك باعدارلامالار بويىنشا 2 ميلليون 396 مىڭ شارشى مەتر تۇرعىن ءۇي سالۋ كوزدەلگەن. ونىڭ باسىم كوپشىلىگى قالا سىرتىندا سالىنادى. 290 مىڭ شارشى مەتر حالىقتىڭ الەۋمەتتىك از قامتىلعان توپتارىن قولجەتىمدى تۇرعىن ۇيمەن قامتاماسىز ەتۋ ءۇشىن مەملەكەتتىك بيۋدجەت ەسەبىنەن قارجىلاندىرىلادى. ءبىز ادام باسىنا شاققاندا 30 شارشى مەتر بولاتىن جوسپارعا قول جەتكىزۋ ءۇشىن جۇمىس ىستەۋدەمىز. ويتكەنى بۇل الماتى قالاسىنىڭ باس جوسپارىندا قاراستىرىلعان»، - دەيدى باسقارما باسشىسى.
ونىڭ ايتۋىنشا، كوپفۋنكتسيونالدى تۇرعىن ءۇي كەشەندەرىندە 8523 پاتەر، 1235 جەكە تۇرعىن ءۇي جانە 3,2 مىڭ شارشى مەتر جاتاقحانا سالىنعان.
«شىلدە ايىندا 1590 پاتەر جانە 167 تۇرعىن ءۇي پايدالانۋعا بەرىلدى. جىلدىڭ سوڭىنا دەيىن 8277 پاتەر جانە 752 جەكە تۇرعىن ءۇي سالۋ جوسپارلانعان. مەملەكەتتىك بيۋدجەت قاراجاتى ەسەبىنەن جىل سوڭىنا دەيىن تاعى 5 مىڭعا جۋىق پاتەردى پايدالانۋعا بەرىلەدى»، - دەيدى الماسحان احمەدجانوۆ.
سونىمەن قاتار، ول جاقىن ارادا 9 دەنساۋلىق ساقتاۋ نىسانى مەن الاتاۋ اۋدانىندا تەننيس كورتىنىڭ قۇرىلىسى باستالاتىنىن ايتتى.
«مەملەكەتتىك- جەكە مەنشىك ارىپتەستىك اياسىندا الاتاۋ، ناۋرىزباي جانە تۇركسىب اۋداندارىندا 12900 ورىنعا ارنالعان 8 مەكتەپ سالىنادى. بۇدان باسقا، قولدانىستاعى مەكتەپتەرگە 13 قوسىمشا قۇرىلىس نىساندارى سالىنادى. سونداي- اق 150 ورىندىق بالاباقشا سالۋ جوسپارلانعان. جەكە ينۆەستورلاردىڭ قاراجاتى ەسەبىنەن 2 جەكە مەكتەپ سالىنادى»، - دەپ اتاپ ءوتتى ول.
