بيىل 1 تريلليون تەڭگەنىڭ 150 جاڭا جوباسى ىسكە قوسىلادى

بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا اتالعان باعدارلامانىڭ وتكەن جىلعى قورىتىندىسىن شىعارعان ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات.

«يندۋستريالدى- يننوۆاتسيالىق دامۋ مەملەكەتتىك باعدارلاماسى ءۇشىنشى جىل ىسكە اسىرىلۋدا. باعدارلامانىڭ نەگىزگى باعىتى - وڭدەۋ ونەركاسىبى. بۇگىنگى تاڭدا ءبىز باعدارلامانىڭ ىسكە اسىرىلۋ ناتيجەلەرىن 2015 -جىلمەن سالىستىرا قورىتىندىلايمىز. باعدارلامانىڭ تابىستى ىسكە اسىرىلۋى وڭدەۋ ونەركاسىبىنىڭ 2015 -جىلمەن سالىستىرعاندا 2017 -جىلدىڭ قورىتىندىسى بويىنشا 5,7 پايىزعا وسۋىنە ىقپال ەتتى»، - دەدى مينيستر.

ونىڭ دەرەگىنشە، ءوسىم نەگىزىنەن مەتاللۋرگيا، تاماق ونەركاسىبى، مۇناي وڭدەۋ، حيميا ونەركاسىبى جانە فارماسيەۆتيكا سالالارىنداعى ءوندىرىستىڭ ارتۋى ەسەبىنەن قامتاماسىز ەتىلگەن.

«مەملەكەتتىك باعدارلامانىڭ نەگىزگى نىسانالى ينديكاتورلارى بويىنشا وڭ سەرپىن بايقالادى. وڭدەۋ ونەركاسىبىنىڭ ەكسپورتى 2015 -جىلمەن سالىستىرعاندا 2017 -جىلدىڭ قورىتىندىسى بويىنشا 10,5 پايىزعا ءوسىپ، 15,5 ميلليارد ا ق ش دوللارىن قۇرادى. 2017 -جىلعى 9 ايدىڭ قورىتىندىسى بويىنشا ەڭبەك ونىمدىلىگى 1,9 پايىزعا ءوستى جانە ءبىر ادامعا شاققاندا 22,3 مىڭ ا ق ش دوللارى بولدى. بۇل رەتتە، ەڭبەك ونىمدىلىگىنە قاتىستى جىلدىق دەرەكتەر 2018 -جىلدىڭ شىلدە ايىندا بەلگىلى بولادى»، - دەدى ول.

جەڭىس قاسىمبەكتىڭ مالىمەتتەرىنە سايكەس، 2017 -جىلى وڭدەۋ ونەركاسىبىندەگى ينۆەستيتسيالار كولەمى 2015 -جىلمەن سالىستىرعاندا 8,8 پايىزعا ءوسىپ، 982 ميلليارد تەڭگەنى قۇراعان.

«مەملەكەتتىك باعدارلاما اياسىندا جىل سايىن جاڭا وندىرىستەردى ىسكە قوسامىز. 3 جىلدا يندۋستريالاندىرۋ كارتاسى اياسىندا 3 تريلليون تەڭگە قارجىعا 378 جوبا ىسكە قوسىلىپ، 30 مىڭنان استام تۇراقتى جۇمىس ورنى اشىلدى. جالپى، 2017 -جىلى 1,5 تريلليون تەڭگە قارجىعا 120 جوبا ىسكە قوسىلىپ، 10 مىڭ تۇراقتى جۇمىس ورنى قۇرىلدى. 2018 -جىلدىڭ سوڭىنا دەيىن 1 تريلليون تەڭگە قارجىعا 150 جاڭا جوبانى ىسكە قوسۋ جوسپارلانىپ وتىر»، - دەدى جەڭىس قاسىمبەك.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى