الماتىدا 1 -تامىزدان باستاپ جول اقىسى 150 تەڭگە بولادى
ال، «وڭاي» كارتاسى بار جولاۋشىلار ءباز قالپىنشا 80 تەڭگەمەن قاتىنايدى. سونداي-اق، مەترونىڭ دا جول ءجۇرۋ قۇنى 80 تەڭگە بولىپ قالا بەرمەك. ايدانا مەيرامباي قىزى جاڭا وزگەرىستەر تۋرالى ايتادى، دەپ حابارلايدى الماتى ارناسى.
كەلەر ايدان باستاپ قوعامدىق كولىكتەردە قولما- قول اقشا تولەيتىن الماتىلىقتار ءبىر بيلەتتى 80 ەمەس، 150 تەڭگەگە ساتىپ الاتىن بولادى. بۇل - جولاۋشىلاردىڭ ەلەكتروندى تولەم جۇيەسىنە جاپپاي كوشۋىنە تۇرتكى. ءسويتىپ، جاۋاپتىلار كولەڭكەلى بيزنەسپەن مىقتاپ كۇرەسۋگە بىلەك سىبانادى. ناتيجەسىن بەرسە، جينالعان قارجىنىڭ ءبىر بولىگىن قالتاسىنا باساتىن كوندۋكتورلار مەن جۇرگىزۋشىلەر ايلا اسىرا المايدى. جاڭا تاريف قالاداعى قوعامدىق كولىكتەردىڭ بارلىعىنا بىردەي بەكىتىلەدى. تەك، مەترودا عانا جول ءجۇرۋ قۇنى وزگەرىسسىز قالادى.
«ءبىزدىڭ ويىمىزشا 1 -تامىزدان باستاپ د ي ف ف تاريف ەنگىزىلەدى. مەترونىڭ باعاسى 80 تەڭگە بولادى، ول كوتەرىلمەيدى. ويتكەنى، مەترو اۆتوكولىك زاڭىنا كەلمەيدى. قوعامدىق كەڭەستەن كەيىن ءبىز اكىمنىڭ پوستانوۆلەنيەسىن يۋستيتسياعا ەنگىزەمىز. ودان كەيىن، يۋستيتسيا ونى تىركەگەن سوڭ 10 كۇننەن كەيىن ول كۇشىنە ەنەدى»، - جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى، بەكزات بەكىشەۆ.
دەسە دە، جاڭا باستاما تولىق كۇشىنە ەنۋى ءۇشىن سوڭعى شەشىمدى قوعامدىق كەڭەس مۇشەلەرى قابىلدايدى ەكەن. ولاردىڭ تەڭ جارتىسى ءبىر رەتتىك تولەم قۇنىنىڭ كوتەرىلۋىن قۇپتاسا، ەندىگىلەرى 150 تەڭگە حالىقتىڭ قالتاسىنا سوققى دەپ كەسىپ ايتتى. بۇل رەتتە جاۋاپتىلار قالاداعى جەڭىلدىگى بار جولاۋشىلار بۇرىنعىداي ارنايى كارتالارىمەن تولەم جاسايتىنىن جەتكىزدى. دەمەك، 150 تەڭگە تەك «وڭاي» كارتاسى جوق تۋريستەر مەن قالا قوناقتارى ءۇشىن بەكىتىلەتىن بولادى.
«د ي ف ف تاريف دەگەنىمىز 150 تەڭگە، ول جاي ءبىر كەز- كەلگەن سان. ول 200 بولۋى مۇمكىن ەدى جاي ىنتالاندىرۋ ءۇشىن. ال، جالپى ءبىزدىڭ ەسەبىمىز 149 جارىمنىڭ ىشىنە كىرەتىنى - ونىڭ ىشىندەگى جانارمايى بار، 30 پايىزى جالاقى، كولىك جاڭارتۋى. ۇكىمەتپەن بەكىتىلگەن مەتوديكاسى بار ءوزىنىڭ، سول بويىنشا دايىندالعان ەسەپ. اكىمشىلىكتىڭ ۇسىنىسى بويىنشا، تۇسكەن 150 تەڭگەدەن جۇرگۋزىشىنى ىنتالاندىرۋ ءۇشىن 50 تەڭگەسى جۇرگىزۋشىگە بەرىلەدى. سونىمەن، ونىڭ جالاقىسى كوتەرىلەتىن بولادى»، - دەدى «الماتى قالالىق جولاۋشىلاردى تاسىمالداۋ كاسىپورىندارىنىڭ قاۋىمداستىعى» زاڭدى تۇلعالار بىرلەستىگىنىڭ جەتەكشىسى، ءسابيت امانبايەۆ.
قازىرگى ۋاقىتتا قالادا جولاۋشىلاردىڭ 70 پايىزى قوعامدىق كولىكتە جول اقىسىن «وڭاي» كارتاسىمەن تولەسە، قالعانى قولما- قول ەسەپ ايىرىسادى ەكەن. ءبىر رەتتىك جول قۇنى قىمباتتاعان سوڭ، تاسىمالعا جاۋاپتىلار جولاۋشىلار اعىنىن ناقتى ەسەپكە الماق. ءارى، كولەڭكەدە جاتقان 6 ميلليون تەڭگەگە جۋىق قارجىنى جارىققا شىعارماق.
«قازىر قالاداعى قوعامدىق كولىكتەردە جول اقىسىنان كۇن سايىن 25 ميلليون تەڭگە كولەمىندە تابىس ءتۇسىپ وتىر. جاز مەزگىلى بولعاندىقتان، ءبىزدىڭ ستۋدەنتتەر، وقۋشىلار، ولاردى ساباققا اپاراتىن اتا- انالارى قوعامدىق كولىكپەن ءجۇرىپ جۇرگەن جوق. ال، باسقا مەزگىلدەردە كۇندەلىكتى تابىس 33 ميلليون تەڭگەگە دەيىن جەتەدى. ءبىراق، ءبىر رەتتىك تولەمدى 150 تەڭگەگە كوتەرگەندە ءبىز كولەڭكەدە جاتقان 25 پايىز اقشانى جارىققا شىعارامىز. وسىلايشا، جول اقىدان تۇسەتىن كۇندەلىكتى قارجى 45 ميلليونعا دەيىن جەتەدى»، - دەدى «الماتى قالاسى كولىك حولدينىگى» جشس ديرەكتورى، سادير حامرايەۆ.
الماتى قالاسى كولىك حولدينگىنىڭ پايىمداۋىنشا، ءبىر رەتتىك تولەم 150 تەڭگەگە كوتەرىلگەندە «وڭاي» كارتاسىن قولدانۋشىلاردىڭ قاتارى 98 پايىزعا دەيىن ارتادى. قالعان 2 پايىزى، قوعامدىق كولىككە ءجيى باس سۇقپايتىندار بولماق. ايتا كەتسەك، قالادا «وڭاي» كارتاسىمەن ورتا ەسەپپەن كۇن سايىن 480 مىڭعا جۋىق ترانزاكسيا جۇرگىزىلەدى ەكەن. ال، ەلەكتروندى كارتا ىسكە قوسىلعالى بەرى ءبىر جىل ىشىندە جاسالعان ترانزاكتسيا كولەمى 174 ميلليوننان اسىپ جىعىلادى.
