وتكەن شىلدە قازاقستانداعى ينفلياتسيا 0,1 پايىزدى قۇرادى

باعا ازىق-تۇلىك تاۋارلارىنا وتكەن ايدا 0,3 پايىزعا تومەندەدى، ال ازىق- تۇلىك ەمەس تاۋارلارىنا - 0,2 پايىزعا، اقىلى قىزمەتتەرگە 0,5 پايىزعا ءوستى.

ۇلتتىق ەكونوميكا مينيسترلىگى ستاتيستيكا كوميتەتىنىڭ مالىمەتىنە قاراعاندا، وتكەن ايدا باعانىڭ تومەندەۋى كارتوپقا 12,3 پايىز، جاڭا جينالعان كوكونىستەرگە - 6,5 پايىز، جۇمىرتقاعا - 4,6 پايىز، قۇس ەتىنە - 0,9 پايىز، ايرانعا - 0,7 پايىزعا، پاستەرلەنگەن سۇتكە، مايەكتى ىرىمشىككە - 0,6 پايىزدان، وسىمدىك-سارى مايىنا - 0,3 پايىزعا بەلگىلەنگەن. سونىمەن ءبىر مەزگىلدە، باعانىڭ ءوسۋى سابىزگە 11,9 پايىز، الماعا - 4,7 پايىز، اپەلسينگە - 1,9 پايىز، كەپتىرىلگەن جەمىستەر مەن جاڭعاقتارعا - 1,2 پايىز، جەمىس جانە كوكونىس شىرىندارىنا - 1,1 پايىز، نانعا - 0,8 پايىز، ارپا جارماسىنا - 0,6 پايىزعا، ۇنتاق جارماسىنا، توقاش جانە ۇننان دايىندالاتىن كونديتەر ونىمدەرىنە 0,5 پايىزدان تىركەلدى.

«باعا ءوسىمى ءتۇسقاعازدار، سۋ ەمۋلسيالىق سىرلارعا 1 پايىزدان، توقىما بۇيىمدارىنا - 0,6 پايىز، جيھاز جانە ۇيگە قاجەتتى زاتتارعا - 0,5 پايىز، سپورتقا، تۋريزمگە جانە تازا اۋاداعى دەمالىسقا ارنالعان جابدىقتارعا - 0,4 پايىز، فارماتسيەۆتيكالىق ونىمدەرگە - 0,3 پايىزدى قۇرادى. ال ساناتورييلەر قىزمەتتەرىنە باعا دەڭگەيى 3,9, كەشەندى دەمالىستاردى ۇيىمداستىرۋ - 2,1, تۇرعىن ءۇي- جايلاردى جوندەۋ جانە قىزمەت كورسەتۋ بويىنشا - 1,3, شاشتارازدار مەن جەكە قىزمەت كورسەتۋ ورىندارىنا - 0,4, قوعامدىق تاماقتاندىرۋ - 0,3 پايىزعا ءوستى»، دەلىنگەن باسپا ءسوز بايانىندا.

ايتا كەتەرلىگى، ەسەپتى كەزەڭدە الىس قاشىقتىققا قاتىنايتىن جولاۋشىلاردىڭ تەمىر جول كولىگىنە جول ءجۇرۋ اقىسى 0,4 پايىزعا قىمباتتاسا، اۋە كولىگى 0,5 پايىزعا ارزانداعان. ال تۇرعىن ءۇي-كوممۋنالدى قىزمەتتەر سالاسىندا تاريفتەر سۋىق سۋعا 7,5 پايىزعا، كارىزگە - 7,4  پايىزعا، تاراتۋ جەلىلەرى بويىنشا تاسىمالداناتىن گازعا - 1,2 پايىزعا، ىستىق سۋعا - 0,4 پايىزعا جوعارىلادى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى