ە. قوشانوۆ: قازاقستان ۇ ق ش ۇ- نىڭ حالىقارالىق ۇيىمدارمەن بايلانىسىن نىعايتۋعا ەرەكشە كوڭىل ءبولدى
ماسكەۋ. KAZINFORM - ءماجىلىس ءتوراعاسى ەرلان قوشانوۆ باستاعان پارلامەنت دەلەگاتسياسى ماسكەۋدە وتكەن ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسى كەڭەسىنىڭ كەزەكتى وتىرىسى مەن ون جەتىنشى پلەنارلىق وتىرىسىنا قاتىستى.
جيىندا ءسوز سويلەگەن ەرلان قوشانوۆ ارىپتەستەرىنە قازاقستاننىڭ ۇ ق ش ۇ- عا ءتوراعالىق ەتۋىنىڭ قورىتىندىلارى تۋرالى ايتىپ بەردى.
- ارىپتەسىمىزبەن بىرلەسكەن ۇيلەسىمدى جۇمىستىڭ ناتيجەسىندە قازاقستان رەسپۋبليكاسى ۇجىمدىق قاۋىپسىزدىك تۋرالى شارت ۇيىمىنا ءتوراعالىق ەتكەن كەزەڭدە ۇيىم الدىندا تۇرعان بارلىق مىندەت تولىق ورىندالدى. استانادا وتكەن كەزدەسۋدە ەلدەرىمىزدىڭ كوشباسشىلارى قازاقستاننىڭ ءتوراعالىعى بارىسىندا اتقارىلعان ءىس-شارالارعا جوعارى باعا بەرىپ، ۇيىمدى ودان ءارى دامىتۋعا باعىتتالعان ماڭىزدى قۇجاتتار قابىلدادى. ءبىز سەرىكتەستەرىمىزگە بۇل قۇجاتتاردىڭ تابىستى جۇزەگە اسىرىلۋىنا قولداۋ كورسەتكەنى ءۇشىن ريزاشىلىعىمىزدى بىلدىرەمىز. ورتاق مۇددەلەرىمىزدى ەسكەرە وتىرىپ، ۇقشۇ پارلامەنتتىك ولشەمىن كەزەڭ-كەزەڭىمەن دامىتۋ مەن نىعايتۋ باعىتىنداعى جۇمىسىمىزدى جالعاستىرامىز، - دەدى ءماجىلىس سپيكەرى.
قازاقستاننىڭ ۇ ق ش ۇ- عا ءتوراعالىعى كەزىندە ۇيىم مۇددەلى ەلدەرمەن جانە قاۋىپسىزدىك سالاسىندا جۇمىس ىستەيتىن حالىقارالىق قۇرىلىمدارمەن ىنتىماقتاستىقتى نىعايتتى.
ۇ ق ش ۇ مەن ت م د، سونداي-اق ش ى ۇ اراسىنداعى بايلانىس جالعاسىن تاپتى. بيىل قازان ايىندا ماسكەۋدە ۇ ق ش ۇ – ت م د – ش ى ۇ فورماتىنداعى ءداستۇرلى كەزدەسۋ ءوتتى. وندا اتالعان ۇيىمداردىڭ نەگىزگى ساياسي پرينتسيپتەرى مەن جارعىلىق ەرەجەلەرىنىڭ ۇقساستىعى اتاپ ءوتىلدى.
2024-جىلى ۇ ق ش ۇ- نىڭ ب ۇ ۇ- نىڭ باقىلاۋشى مارتەبەسىن العانىنا 20 جىل تولدى. سونداي-اق وسى جىلدىڭ قاراشا ايىندا نيۋ-يوركتە ب ۇ ۇ مەن ۇ ق ش ۇ اراسىنداعى ىنتىماقتاستىق تۋرالى بىرلەسكەن قارار قابىلداندى.
ءماجىلىس سپيكەرى ءوز سوزىندە ۇ ق ش ۇ پارلامەنتتىك اسسامبلەياسى مۇشە مەملەكەتتەرگە قاۋىپسىزدىك پەن تۇراقتىلىق ماسەلەلەرى بويىنشا سىندارلى ديالوگ جۇرگىزۋگە مۇمكىندىك بەرەتىنىن ايتتى.
سوڭعى جىلدارى اسسامبلەيا ۇجىمدىق قاۋىپسىزدىكتىڭ ماڭىزدى اسپەكتىلەرىن قامتيتىن ءبىرقاتار مودەلدىك زاڭنامالىق اكتى قابىلدادى. اتاپ ايتقاندا، اقپاراتتىق جانە بيولوگيالىق قاۋىپسىزدىك، تەرروريزم مەن ەكسترەميزمگە قارسى كۇرەس، ەسىرتكى ساۋداسىنا توسقاۋىل قويۋ سالالارىنداعى قۇجاتتار.
ەرلان قوشانوۆ قازاقستان توراعالىعىمەن ۇلى جەڭىستىڭ 80 جىلدىعىن اتاپ وتۋگە دايىندىققا ەرەكشە نازار اۋدارىلعانىن ايتتى. وتىرىستىڭ قورىتىندىسى بويىنشا الداعى مەرەيتويعا وراي ۇ ق ش ۇ پارلامەنتتىك اسسامبلەياسىنىڭ ۇندەۋى قابىلداندى.
ۇ ق ش ۇ پارلامەنتتىك اسسامبلەياسى ءىس-شارالارى اياسىندا دەلەگاتسيا باسشىلارى رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. ەرلان قوشانوۆ رەسەي پرەزيدەنتىنە قازاقستان پرەزيدەنتى قاسىم-جومارت توقايەۆتىڭ جىلى لەبىزىن جەتكىزىپ، قازاقستان مەن رەسەي اراسىنداعى پارلامەنتارالىق قارىم-قاتىناستىڭ جوعارى قارقىنىن اتاپ ءوتتى.
كەلەسى جىلى ۇ ق ش ۇ- عا قىرعىز رەسپۋبليكاسى ءتوراعالىق ەتەدى.
وتىرىستا قازاقستان تاراپىمەن قاتار، رەسەي فەدەراتسياسى مەملەكەتتىك دۋماسىنىڭ ءتوراعاسى ۆياچەسلاۆ ۆولودين، بەلارۋس رەسپۋبليكاسى ۇلتتىق جينالىسى وكىلدەر پالاتاسىنىڭ ءتوراعاسى يگور سەرگەەنكو، قىرعىز رەسپۋبليكاسى جوگوركۋ كەنەشىنىڭ ءتوراعاسى نۇرلانبەك شاكيەۆ، تاجىكستاننىڭ مادجليسي نامويانداگون مادجليسي ولي ءتوراعاسى ماحمادتوير زوكيرزودا، سونداي-اق ۇ ق ش ۇ باس حاتشىسىنىڭ ورىنباسارى تاالاتبەك ماسادىكوۆ، ۇ ق ش ۇ پارلامەنتتىك اسسامبلەياسىنىڭ جاۋاپتى حاتشىسى سەرگەي پوسپەلوۆ جانە سەربيا رەسپۋبليكاسى، الجير حالىق دەموكراتيالىق رەسپۋبليكاسى مەن يران يسلام رەسپۋبليكاسىنىڭ وكىلدەرى قاتىستى.
