ۇ ق ك: جەلىدە تەرروريزمدى ناسيحاتتادى دەگەن كۇدىكپەن 4 قازاقستاندىق ۇستالدى
استانا. KAZINFORM - ۇ ق ك الماتى، شىمكەنت قالالارىندا جانە تۇركىستان وبلىسىندا ءدىني راديكالداردىڭ زاڭسىز ارەكەتىنە توسقاۋىل قويدى.
2025 -جىلعى 17-اقپاندا ۇ ق ك پروكۋراتۋرا ورگاندارىنىڭ ۇيلەستىرۋىمەن، پوليسيانىڭ كومەگىمەن الماتى، شىمكەنت قالالارىندا جانە تۇركىستان وبلىسىندا ءدىني راديكالدار ارەكەتىنىڭ جولىن كەستى.
- تەرروريزمدى، سونىڭ ىشىندە الەۋمەتتىك جەلىلەر ارقىلى ناسيحاتتادى دەگەن كۇدىكپەن 4 قازاقستاندىق ۇستالدى. ولاردىڭ تۇرعىلىقتى جەرلەرىن ءتىنتۋ بارىسىندا زاتتاي دالەلدەمەلەر تاركىلەندى. قىلمىستىق كودەكستىڭ 256-بابى بويىنشا سوتقا دەيىنگى تەرگەپ- تەكسەرۋ جۇرگىزىلۋدە. قىلمىستىق- پروتسەستىك كودەكستىڭ 201-بابىنىڭ 1-بولىگىنە سايكەس وزگە اقپارات جاريا ەتۋگە جاتپايدى، - دەپ اتاپ ءوتتى ۆەدومستۆونىڭ باسپا ءسوز قىزمەتى.
وسىعان دەيىن جامبىل وبلىسىندا ءدىني راديكالدار توبىنىڭ 11 مۇشەسى ۇستالعانىن جازعان ەدىك.
