بەس ادامنىڭ ولىمىنە سەبەپ بولعان ورتكە 100 پايىز جۇمىس بەرۋشى كىنالى - مينيستر
«قازاقستان» شاحتاسىنداعى 5 كەنشى قازا بولعان قايعىلى وقيعا جونىندەگى ۇكىمەتتىك كوميسسيا تەرگەۋ ناتيجەسىن جاريالادى.
ق ر ت ج ءمينيسترى سىرىم ءشارىپحانوۆ ۇكىمەتتىك كوميسسيانىڭ تەرگەۋ قورىتىندىسىن جاريالادى. بەلگىلى بولعانداي، ءورت تۇتانۋىنا بىرنەشە فاكتور سەبەپ بولعان.
«تەكسەرىس بەلگىلەنگەن تالاپتارعا ساي ءوتتى. كوميسسيانىڭ ساراپتامالىق قورىتىندىسى اپات پەن جازاتايىم وقيعانىڭ نەگىزگى سەبەپتەرىن انىقتاپ بەردى. ءبىرىنشىسى - كومىر كونۆەيەرىندەگى ءورت مەحانيكالىق ەنەرگيانىڭ جىلۋ ەنەرگياسىنا اۋىسۋىنان شىقتى. كونۆەيەردىڭ كەپتەلىپ قالعان روليگىندەگى تاسپا توسەمىنىڭ ۇيكەلۋىنە بايلانىستى وت تۇتانعان. ەكىنشىسى - «قازاقستان» شاحتاسىنىڭ ينجەنەرلىك- تەحنيكالىق قۇرامى تاراپىنان باقىلاۋ ءوندىرىسىنىڭ بولماۋى. سونداي- اق، قاۋىپسىزدىك تەحنيكاسىنىڭ ساقتالماۋى جانە ەنەرگيا- مەحانيكالىق قىزمەتتىڭ ءالسىز باقىلاناتىنى انىقتالدى. ءۇشىنشىسى - قاۋىپسىزدىك تالاپتارىن جانە تەحنيكالىق رەتتەۋ نورمالارىن بۇزۋ. بۇل دەگەنىمىز - سايكەستىك سەرتيفيكاتىنسىز تاسپا توسەمىن پايدالانۋ. سوڭعىسى، جۇمىس ايماعىنىڭ توزاڭدانۋى مەن جانعىش زاتتاردان، تاۋ-كەن قازبالارىنان اۋانىڭ گازدانۋى شاحتا قىزمەتكەرلەرىنىڭ ولىمىنە اكەپ سوقتى»، - دەپ اتاپ ءوتتى ق ر ت ج ءمينيسترى سىرىم ءشارىپحانوۆ.
بۇدان باسقا، ەڭبەك زاڭناماسى نورمالارىنىڭ بۇزىلۋى جانە انىقتاۋ جۇيەسىنە قىزمەت كورسەتەتىن مامانداردىڭ جەتكىلىكسىزدىگى، باسقارۋ قۇرىلىمى وزگەرگەن كەزدە ولاردى لاۋازىمعا تاعايىنداعانعا دەيىن جاۋاپتى باسشىلارعا لاۋازىمدىق نۇسقاۋلىقتىڭ بولماعانى انىقتالدى.
«كوميسسيا جۇمىسىنىڭ ناتيجەسى بويىنشا جۇمىس بەرۋشىنىڭ %100 كىنالى ەكەنى انىقتالدى. زاڭنامانى بۇزعان 28 جاۋاپتى تۇلعا بەلگىلى بولدى»، - دەدى سىرىم ءشارىپحانوۆ.
ەسكە سالايىق، قاراعاندى وبلىسىنداعى «قازاقستان» شاحتاسىندا ءورت 17-تامىز كۇنى شىققان بولاتىن.
اپات كەزىندە جەر استىندا 227 كەنشى بولدى. 222 ادامدى جەر بەتىنە جەدەل كوتەرۋ مۇمكىن بولدى، سەگىزى زارداپ شەكتى.
شاحتانىڭ استىندا قالىپ قويعان بەس كەنشىنىڭ دەنەسى تابىلدى.
18-تامىزداعى جاعداي بويىنشا مەديتسينا مەكەمەلەرىندە ورتتەن زارداپ شەككەن 11 كەنشى ەم قابىلداپ جاتتى.
پرەزيدەنت قاسىم-جومارت توقايەۆ ءورت سەبەبىن انىقتاۋ ءۇشىن جان-جاقتى تەرگەۋ جۇرگىزۋدى تاپسىردى.
