ەڭ العاش گازەت قاشان، قاي ەلدە جارىق كورگەن؟
استانا. قازاقپارات - مەرزىمدى باسپا ءسوزدىڭ ەڭ نەگىزگى ءارى كونە تۇرلەرىنىڭ ءبىرى - گازەت. قاعاز ءوندىرىسىنىڭ دامىپ، پوليگرافيالىق تەحنولوگيانىڭ باستاپقى تاسىلدەرىنىڭ جەتىلدىرىلۋىنە بايلانىستى العاشقى گازەتتەر باتىس ەۋروپا ەلدەرىندە شىعا باستادى.
ناقتىراق ايتار بولساق، گەرمانيادا - 1609 -جىلى، ۇلى بريتانيادا - 1622-جىلى، فرانسيادا 1631- جىلى العاشقى باسىلىمدار جارىق كورگەن ەكەن.
قازاق تىلىندەگى العاشقى مەرزىمدىك باسىلىم - «تۇركىستان ءۋالاياتىنىڭ گازەتى» دەگەن اتپەن 1870 -جىلى تاشكەنت قالاسىندا جارىق كورگەن. بۇل باسىلىم قازاق دالاسىندا رەسەي يمپەرياسىنىڭ وتارلاۋشىلىق ساياساتىن جۇرگىزۋدىڭ قۇرالى رەتىندە دۇنيەگە كەلگەنىمەن، ۇلتتىڭ باسپاءسوزىن قالىپتاستىرىپ، زيالى قاۋىمنىڭ ازاتتىق يدەيالارىن بۇقاراعا جەتكىزۋدە باسپاءسوزدىڭ ماڭىزى زور ەكەندىگىن تۇسىنۋىنە ىقپال ەتتى.
الەمدەگى ەڭ تارالىمدى گازەت بولىپ جاپونيالىق Yomiuri Shimbu باسىلىمى مويىندالدى. ونىڭ ءبىر كۇندىك تارالىمى 14 ميلليون 67 مىڭدى قۇراپ وتىر. جاپونيا الەمدەگى ينتەرنەتى دامىعان ەلدەردىڭ كوش باسىندا. سوعان قاراماستان، گازەتكە دەگەن سۇرانىس جىل سايىن ارتۋ ۇستىندە. ال گيننەس كىتابىنا تىركەلگەن ەڭ كوپ تارالىم رەسەيلىك گازەتكە تيەسىلى. «ارگۋمەنتى ي فاكتى» باسىلىمىنىڭ تارالىمى 1990 - جىلى 33 ميلليون 431 مىڭعا جەتكەن ەكەن.
