قازاقستاندىقتار 15 - قاراشاعا دەيىن قالاعان ەمحاناسىنا تىركەلە الادى
جىل سايىن ەلىمىزدە 15 - قىركۇيەكتەن 15 - قاراشاعا دەيىن ەمحانانى ەركىن تاڭداۋ ناۋقانى وتەدى. بۇل رەتتە ەلوردالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى اينۇر تولەۋوۆا ەمحانا تاڭداۋ جانە تىركەلۋ جونىندە اقىل- كەڭەس بەردى، دەپ حابارلايدى قازاقپارات ءتىلشىسى.
«بۇل ازاماتتارعا قارالىپ جۇرگەن ەمحاناسىنا كوڭىلى تولمايتىن نەمەسە تۇرعىلىقتى مەكەنجايىن اۋىستىرعان جاعدايدا نەمەسە باسقا سەبەپتەرگە بايلانىستى ەمدەۋ مەكەمەسىن تاڭداۋعا مۇمكىندىك بەرەدى. ءبىراق مۇندا تۇرعىلىقتى اۋماق شەگىن ۇمىتپاعان ءجون. ماسەلەن استانادا 5 اۋدان بولسا، ءار ادام ءوز اۋدانىنداعى ەمحانالار اراسىندا تاڭداۋ جاساي الادى. ءۇي جاعدايىندا مەديتسينالىق كومەكتى دە ەمحانا ءوزىنىڭ قىزمەت كورسەتۋ اۋماعىندا جۇزەگە اسىرادى. سوندىقتان، كىشكەنتاي بالاسى بارلار، جۇكتى ايەلدەر، مۇمكىندىگى شەكتەۋلى جاندار وسىنى ەسكەرۋى كەرەك. ولارعا كونسۋلتاتيۆتى- دياگنوستيكالىق كومەك، كۇندىزگى ستاتسيونار جانە الەۋمەتتىك كومەك كورسەتىلەدى»، - دەدى ا. تولەۋوۆا استانا كوممۋنيكاتسيالار قىزمەتىندە وتكەن بريفينگتە.
پاتسيەنت قىزمەتتەر پاكەتىن 2024 -جىلدىڭ 1 -قاڭتارىنان باستاپ الا باستايدى، ياعني 31 -جەلتوقسانعا دەيىن بۇرىن تىركەلگەن ەمحاناعا قارالۋدى جالعاستىرادى.
«ەمحاناعا تىركەلۋ جولدارى وزگەرگەن جوق. ونىڭ 2 ءتۇرلى ءتاسىلى بار. ءبىرىنشىسى - «ەلەكتروندى ۇكىمەت» ۆەب- پورتالى ارقىلى «مەديتسينالىق- سانيتارلىق كومەك كورسەتەتىن مەديتسينا ۇيىمدارىنا تىركەۋ» قىزمەتىن پايدالانۋ، ەكىنشىسى - ەمحاناعا بارىپ، ءوتىنىش جازۋ ارقىلى تىركەلۋ. ايتا كەتەتىن جايت، ەكىنشى ءتاسىلدى زەينەتكەرلەر، مۇگەدەكتەر، بالا كەزدەن مۇگەدەك ازاماتتاردىڭ قامقورشىلارى، تۇرمەدە جازاسىن وتەپ جاتقاندار، ستۋدەنتتەر، اسكەري بورىشىن وتەپ جاتقاندار، شەتەلدە تۋعان بالالار مەن سەنىمحات ارقىلى تىركەلەتىن ازاماتتار پايدالانا الادى»، - دەيدى اينۇر تولەۋوۆا.
سونداي- اق، ناۋقاس باسقا ەلدىمەكەندە (ءىسساپاردا، قوناقتا) اۋىرىپ قالسا، شۇعىل مەديتسينالىق كومەك الۋ ءۇشىن جاقىن ماڭداعى مەديتسينالىق ۇيىمعا جۇگىنە الادى نەمەسە جەدەل مەديتسينالىق جاردەم بريگاداسىن شاقىرا الادى.
