جۇبىنا ەڭ ادال تىرشىلىك يەلەرى
جەر بەتىندە جالعىز عانا جۇبىمەن ءومىر سۇرەتىن تىرشىلىك يەلەرى جەتەرلىك. مۇنداي قارىم- قاتىناستى مونوگاميا دەپ اتايدى.
بۇل - تەك ادامدارعا عانا ءتان ەرەكشەلىك ەمەس. ويتكەنى الەمدە ەكىنشى جارتىسىنا ادال جان- جانۋارلار مەن قۇستار دا بار. وسى جايلى قىزىقتى اقپارات ۇسىنامىز.
قاسقىر
بۇل جىرتقىشتار ومىردە ءبىر عانا ومىرلىك سەرىك تاڭدايدى. ءۇيىر بولىپ ءومىر سۇرەتىندىكتەن، قاسقىرلاردىڭ يەرارحياسى وتە كۇردەلى. ادەتتە قاسقىرلاردىڭ انالىق پەن اتالىعىنىڭ مارتەبەسى بىردەي بولادى. قاسقىر ءۇيىرى ءبىراز ۋاقىت ءبىر-بىرىنەن اجىراسا دا، جۇپ قاسقىرلار قايتا قوسىلادى. قىستا بولاتىن جۇپتاسۋ كەزەڭىندە تەك ءوز جارتىسىمەن بولادى، ال "باسى بوس" قاسقىرلار وسى كەزەڭدە جۇبىن ىزدەيدى.
پينگۆين
جانۋارلار الەمىنىڭ تاعى ءبىر جاۋاپتى وتباسى مۇشەلەرى - پينگۆيندەر. اتالىعى ۇرپاعىن ۇرعاشىسىمەن بىرگە كۇتەدى: جۇمىرتقا باسۋعا كومەكتەسەدى جانە جۇمىرتقادان شىققان پينگۆينگە قامقورلىق جاسايدى.
ەگەر انالىق كەنەتتەن قايتىس بولسا، اتالىق ۇرپاقتى تاربيەلەۋدىڭ بارلىق فۋنكتسيالارىن ءوز موينىنا الادى. اتا-انانىڭ ءرولىن تولىق ءوزى اتقارادى.
اققۋ
ماحابباتتىڭ سيمۆولى سانالاتىن بۇل قۇستار سەزىمگە ادال ەكەنى كوپشىلىككە ايان. اققۋلار سەرىگى ولگەندە عانا جۇبىن اۋىستىراتىنى بەلگىلى. ءبىراق كەيدە اققۋلاردىڭ ەكىنشى جارتىسى ساعىنىشتان قۇسا بولىپ ولسە، ەندى كەيبىرى ءومىر بويى جالعىز ءومىر سۇرەدى. دەگەنمەن جۇبىنان ايىرىلعان سوڭ، ۇزاق ۋاقىت وتپەي، بىردەن ەكىنشى جارتىسىن تاۋىپ الاتىن اققۋلار دا از ەمەس.
قۇندىز
قۇندىزدار دا جانۋارلار اراسىندا مىقتى وداق قۇرا الاتىنىمەن ەرەكشەلەنەدى. ەكەۋى بىرگە ۇيلەرىن جابدىقتاپ، ۇرپاقتارىنا قامقورلىق جاسايدى. جۇپتا انالىقتىڭ ءرولى باسىم بولعانىمەن، اتالىقتىڭ دا جۇمىسى جەتەرلىك. ويتكەنى جاڭا ۇرپاقتى عانا ەمەس، وتكەن جىلداردا دۇنيەگە كەلگەن كىشكەنتاي قۇندىزداردى دا باعىپ- قاعۋى كەرەك.
گيببون
ۇيىرمەن ەمەس، تەك جۇبىمەن ءومىر سۇرەتىن قولى ۇزىن مايمىلدار - ادامدار سياقتى وتباسىن قۇراتىن تىرشىلىك يەلەرى. ءبىر قىزىعى، ولاردا گەندەرلىك تەڭدىككە ۇقساس نارسە بار. انالىق پەن اتالىقتارى وتباسىلىق مىندەتتى بىردەي ەكىگە بولەدى.
تەك ادامدار، جانۋارلار مەن قۇستار عانا ەمەس، سونىمەن قاتار جاندىكتەر دە عاشىعىنا ماڭگى ادالدىعىن ساقتاي الادى. ويتكەنى بۇل ءتاسىل اتا-انالاردىڭ وزدەرىنە دە، ولاردىڭ ۇرپاقتارىنا دا قالىپتى ءومىر سۇرۋگە كوبىرەك مۇمكىندىك بەرەدى.
