پوليتسەيلەر قاي جەردە تەمەكى شەگۋگە بولمايتىنىن ەسكە سالدى
جىل باسىنان پەتروپاۆلدا قوعامدىق ورىندا تەمەكى شەككەن 274 ادام جاۋاپكەرشىلىككە تارتىلدى. ال جالپى پايدالانۋ ورىندارىن لاستاعانى ءۇشىن 956 ادام جازالاندى، دەپ حابارلايدى قازاقپارات ءتىلشىسى.
پوليتسەيلەر ءبىرقاتار قوعامدىق ورىندا تەمەكى ونىمدەرىن، ەلەكتروندىق تەمەكىنى تۇتىنۋعا، پايدالانۋعا زاڭمەن تىيىم سالىنعانىن ەسكەرتەدى. مۇنداي ورىندارعا ءبىلىم بەرۋ ۇيىمدارى، ولاردىڭ ىرگەلەس اۋماقتارى، مەديتسينا مەكەمەلەرى، مەملەكەتتىك ۇيىمدار، قوعامدىق تاماقتانۋ ورىندارى، سپورتتىق- مادەني نىساندار، تۇنگى كلۋبتار، كوپپاتەرلى ۇيلەردىڭ كىرەبەرىستەرى جاتادى. قوعامدىق كولىكتە، سونداي- اق كامەلەتكە تولماعان بالالار وتىرعان جەكە كولىكتە تەمەكى شەگۋگە بولمايدى. بۇدان بولەك، ۆوكزال عيماراتتارى مەن جابىق ايالدامالاردا، ءورت تۇتانۋ قاۋپىنە بايلانىستى جانارماي قۇيۋ ستانسيالارىنىڭ اۋماعىندا بۇل ءونىمدى تۇتىنۋعا رۇقسات جوق.
تەمەكى شەگۋگە تىيىم سالىنعان ورىنداردىڭ تولىق تىزىمىمەن ق ر حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكستىڭ 110-بابىندا تانىسۋعا بولادى.
«تاجىريبە كورسەتىپ وتىرعانداي، وبلىس ورتالىعىنىڭ تۇرعىندارى مەن قوناقتارى پودەزدەردە، جانارماي قۇيۋ ستانسيالارى ماڭىندا جانە ستاديونداردا تەمەكى شەگىپ، ەرەجەلەردى ءجيى بۇزادى. پوليتسيا قىزمەتكەرلەرى مۇنداي فاكتىلەردى كۇندەلىكتى جۇمىس بارىسىندا، بەينەباقىلاۋ كامەرالارى ارقىلى، كەيدە تۇرعىنداردىڭ حابارلاۋى بويىنشا انىقتايدى. ايتا ەتۋ كەرەك، كوبىنەسە تەمەكى شەگۋشىلەر قوقىس جاشىكتەرىن ەلەمەي، مادەني دەڭگەيدىڭ تومەندىگىن كورسەتەدى.
جىل باسىنان ق ر اكىمشىلك قۇقىق بۇزۋشىلىقتار تۋرالى كودەكسىنىڭ 434-2-بابى بويىنشا جالپى پايدالانۋ ورىندارىن لاستاعانى ءۇشىن 956 ادام جاۋپقا تارتىلدى. ولاردىڭ باسىم بولىگى كوشەلەرگە تەمەكى تۇقىلىن لاقتىرىپ كەتكەن. سوندىقتان دا، تۇرعىنداردان زاڭنامانىڭ تالاپتارىن ساقتاۋدى جانە اينالاسىنداعىلارعا قاراپايىم قۇرمەت كورسەتۋدى سۇرايمىز»، - دەيدى پەتروپاۆل قالالىق پوليتسيا باسقارماسى جەرگىلىكتى پوليتسيا قىزمەتى ءبولىمىنىڭ باستىعى ايدىن اقماعامبەتوۆ.
