دارىگەردى ساباپ، ءمايىتتى ۇرلاعان: الماتى وبلىسىنىڭ اۋرۋحاناسىندا جانجال شىقتى
تالعار اۋداندىق ورتالىق اۋرۋحاناسىندا قايتىس بولعان ناۋقاستىڭ ۇلدارى جانساقتاۋ ءبولىمىنىڭ دارىگەرى مەن مەيىرگەرىن سوققىعا جىقتى.
زارداپ شەككەن مەديتسينا قىزمەتكەرلەرىنىڭ جاعدايى اۋىر، دەپ حابارلايدى قازاقپارات ءتىلشىسى.
تالعار اۋداندىق اۋرۋحاناسىنىڭ مالىمەتىنشە، اكەسىنىڭ قايتىس بولعانىن ەستىگەن ۇلدارى مەديتسينا قىزمەتكەرلەرىنە كۇش كورسەتىپ، مارقۇمنىڭ دەنەسىن الىپ كەتكەن. دەنساۋلىق مەكەمەسىندەگى جانجال ۆيدەوسى الەۋمەتتىك جەلىدە تارادى.
«قايتىس بولعان ەر ادامنىڭ ۇلدارى كىسى ءولىمى تۋرالى دارىگەر انىقتاماسىنىڭ رەسمي ءراسىمىن كۇتپەستەن جانساقتاۋ بولىمىنە كىرىپ، ونداعى دارىگەر مەن مەيىرگەردى سوققىعا جىقتى، مارقۇمنىڭ دەنەسىن مەديتسينالىق توسەك اربامەن بىرگە ۇرلاپ كەتتى»، - دەلىنگەن تالعار اۋداندىق ورتالىق اۋرۋحاناسىنىڭ اكىمشىلىگى تاراتقان مالىمەتتە.
جاسالعان شابۋىل سالدارىنان انەستەزيولوگ-رەانيماتولوگ دارىگەرگە باس ميىنىڭ جاراقاتى، كوپتەگەن تەرىاستى گەماتوماسى، كەڭسىرىكتىڭ جابىق سىنىعى دياگنوزى قويىلدى. مەيىرگەرگە ميدىڭ جابىق جاراقاتى، ماڭدايدىڭ جۇمساق تىندەرىنىڭ كوگەرۋى، مۇرىننىڭ جابىق سىنىعى دياگنوزى قويىلدى.
«شاقىرتۋ بويىنشا وقيعا ورنىنا جەتكەن تالعار اۋداندىق پوليتسيا قىزمەتكەرلەرى قايتىس بولعان ادامنىڭ دەنەسىن قايتارۋ جانە دارىگەرلەرگە شابۋىل جاساعانى ءۇشىن كىنالىلەردى ۇستاۋ بويىنشا قاجەتتى شارالار قابىلدادى. اتالعان فاكتىگە الدا قۇقىقتىق باعا بەرىلەدى»، - دەپ اتاپ ءوتتى اۋرۋحانادان.
