قازاقستاندا كۋرسانتتار تۋرالى سەريال ءتۇسىرىلىمى باستالدى
قورعانىس ءمينيسترى رۋسلان جاقسىلىقوۆ قۇرلىق اسكەرلەرىنىڭ اسكەري ينستيتۋتىندا بولىپ، بولاشاق وفيتسەرلەر تۋرالى تەلەحيكايانىڭ ءتۇسىرىلىم بارىسىمەن تانىستى، دەپ حابارلايدى قازاقپارات.
مينيسترلىكتىڭ باسپا ءسوز قىزمەتىنەن ءمالىم ەتكەندەي، سەريال قازاقستاننىڭ تۇڭعىش قورعانىس ءمينيسترى، حالىق قاھارمانى، ارميا گەنەرالى ساعادات نۇرماعامبەتوۆتىڭ 100 جىلدىعىنا ارنالعان.
ءبىر اپتا بۇرىن باستالعان ءتۇسىرىلىم ەكى ايعا سوزىلادى. فيلم 42 مينۋتتىق، 20 سەريادان تۇرادى. وقۋ ورنىندا قورعانىس ءمينيسترى ر. جاقسىلىقوۆ شىعارماشىلىق ۇجىممەن كەزدەستى.
تەلەحيكايانىڭ پرەمەراسى 2024 -جىلدىڭ باسىندا وتاندىق تەلەارنادا وتپەك. سەريال قازاقستان رەسپۋبليكاسى قارۋلى كۇشتەرى ۇلتتىق اسكەري- پاتريوتتىق ورتالىعىنىڭ قولداۋىمەن ءتۇسىرىلىپ جاتىر.
كينوكارتيناداعى قيمىلدار قۇرلىق اسكەرلەرى اسكەري ينستيتۋتىنىڭ قابىرعاسىندا وتەدى. سيۋجەتتە كوبىنە وفيتسەر بولۋدى ارماندايتىن كۋرسانتتاردى كورەمىز. اسكەري ادامداردىڭ ومىرىنە ارنالعان كوپتەگەن فيلمدەر سياقتى مۇندا دا ابىروي، پارىز، جاۋاپكەرشىلىك سەزىمى جانە وتانعا دەگەن سۇيىسپەنشىلىك سياقتى ماڭىزدى تاقىرىپتار قوزعالادى. ارينە ماحاببات حيكايالارىن دا اينالىپ وتپەيدى، - دەلىنگەن ۆەدومستۆو مالىمەتىندە.
بۇل وفيتسەر كادرلاردى دايارلايتىن اسكەري وقۋ ورنىنىڭ كۋرسانتتارى تۋرالى ەلىمىزدەگى العاشقى سەريال بولماق.
قورعانىس ۆەدومستۆوسىنىڭ باسشىسى ءداستۇر بويىنشا ءتۇسىرىلىم توبىمەن بىرگە تاباقشا سىندىرىپ، تىلەگىن ءبىلدىردى.
ارميا گەنەرالى س. نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ 50 جىلدان استام تاريحى بار. اسكەري ينستيتۋت وسى جىلدار ىشىندە مىڭداعان وفيتسەر كادرلاردى دايىنداپ شىعاردى. ونىڭ العاشقى تۇلەكتەرىنىڭ قاتارىندا حالىق قاھارمانى گەنەرال- لەيتەنانت باقىتجان ەرتايەۆ بار. قورعانىس ءمينيسترى دە وسى اسكەري وقۋ ورنىنىڭ تۇلەگى ەكەنىن ايتا كەتەيىك.
